ເຂດເສດຖະກິດພິເສດສາມຫຼ່ຽມຄຳໃນລາວ ຍັງຄົງເປັນສູນລວມຂອງບັນດາກຸ່ມແກັ່ງອາດຊະຍາກຳຈີນ ໂດຍສະເພາະແມ່ນອາດຊະຍາກຳທາງອິນເຕີເນັດ ທີ່ກ່ຽວຂ້ອງໂດຍກົງກັບບ່ອນກາສິໂນ King Roman.
Your browser doesn’t support HTML5
ເຂດເສດຖະກິດພິເສດສາມຫຼ່ຽມຄຳໃນລາວ ຍັງຄົງເປັນສູນລວມຂອງບັນດາກຸ່ມແກັ່ງອາດຊະຍາກຳຈີນ
ສາດສະດາຈານ ດຣ. ປິ່ນແກ້ວ ເຫຼືອງອະຫຼ່າມສີ ຜູ້ຊ່ຽວຊານດ້ານສັງຄົມວິທະຍາ ແລະມະນຸດສາດ ມະຫາວິທະຍາໄລຊຽງໃໝ່ ໃຫ້ທັດສະນະວ່າ ເປັນການຍາກຢ່າງຍິ່ງທີ່ບັນດາປະເທດໃນລຸ່ມແມ່ນໍ້າຂອງຈະສາມາດດຳເນີນມາດຕະການປາບປາມແກັ່ງອາດຊະຍາກໍາຊາວຈີນໃຫ້ໝົດໄປຈາກເຂດລຸ່ມແມ່ນໍ້າຂອງໄດ້ຢ່າງສິ້ນເຊີງ ນອກຈາກຈະໄດ້ຮັບການຮ່ວມມືຢ່າງແທ້ຈິງຈາກບັນດາບໍລິສັດຈີນ ທີ່ລົງທຶນຢູ່ເຂດພັດທະນາເສດຖະກິດຕ່າງໆ ໂດຍສະເພາະແມ່ນເຂດທີ່ມີບ່ອນກາຊີໂນດ້ວຍນັ້ນ ກໍຄືເຂດທີ່ຫຍຸ້ງຍາກທີ່ສຸດໃນການປາບປາມ ເນື່ອງຈາກວ່າ ນັກລິ້ນການພະນັນສ່ວນໃຫຍ່ ກໍເປັນຊາວຈີນ ໃນຂະນະທີ່ເຈົ້າຂອງບ່ອນກາຊີໂນ ແລະເຄືອຂ່າຍຂອງແກັ່ງອາດຊະຍາກໍາທາງອິນເຕີເນັດ ລວມທັງບັນດາລູກຈ້າງສ່ວນໃຫຍ່ດ້ວຍນັ້ນ ກໍ່ເປັນຄົນຈີນເຊັ່ນດຽວກັນ ຈຶ່ງເປັນການຍາກທີ່ຈະຈຳແນກລະຫວ່າງກຸ່ມອາດຊະຍາກອນ ກັບກຸ່ມທີ່ຕົກເປັນເຫຍື່ອຂອງແກັ່ງອາດຊະຍາກຳ ດັ່ງທີ່ ສາດສະດາຈານ ດຣ. ປິ່ນແກ້ວ ໄດ້ຍົກຕົວຢ່າງ ເຂດເສດຖະກິດພິເສດສາມຫລ່ຽມຄຳໃນລາວ ວ່າ
“ຍ້ອນວ່າທຸລະກິດກາຊີໂນ ຄົນທີ່ເຂົາຈະຈ້າງແມ່ນຄົນທີ່ສາມາດເຂົ້າເຖິງເຕັກໂນໂລຈີເຫຼົ່ານີ້ໄດ້ ພາບທີ່ເຫັນກໍຄືໃນຂະນະທີ່ຄົນຈີນ ໄດ້ພາກັນເຂົ້າມາເປັນຈໍານວນຫຼວງຫຼາຍນັບເປັນແສນຄົນນັ້ນ ຄົນທ້ອງຖິ່ນກໍຖືກໄລ່ອອກໄປ ອັນນີ້ຄືທຸກໆບ່ອນກໍເປັນແບບນັ້ນ ປະເທດລາວກໍຄືກັນ ລອງໄປເບິ່ງໃນເຂດເສດຖະກິດພິເສດສາມຫລ່ຽມຄຳ ຄົນທີ່ເຮັດວຽກຢູ່ໃນນັ້ນ ຖ້າເວົ້າພາສາຈີນບໍ່ໄດ້ ກໍເຮັດວຽກບໍ່ໄດ້ແລ້ວເຈົ້າຈະຂາຍໃຫ້ໃຜ? ກໍ່ໃນເມື່ອລູກຄ້າສ່ວນໃຫຍ່ເປັນກຸ່ມຄົນຈີນ ສະນັ້ນ ຄົນລາວ ຈຶ່ງຕ້ອງໄປຮຽນພາສາຈີນ ຊຶ່ງຈຳນວນຄົນເມື່ອທຽບສັດສ່ວນກັບຄົນຈີນແລ້ວ ມັນກໍ່ຍ່ອມຫນ້ອຍກວ່າຢູ່ແລ້ວ ມັນກໍຄ້າຍຄືກັບກຸ່ມຄົນຈີນໄດ້ພາກັນຍ້າຍຖິ່ນຖານເຂົ້າມາຢູ່."
ສ່ວນລາຍງານຂອງ ຄະນະກຳມາທິການຄວາມໝັ້ນຄົງແຫ່ງລັດ ສະພາຜູ້ແທນລາຊະດອນໄທ ລະບຸວ່າ ເຂດສາມຫລ່ຽມຄຳ ທີ່ເປັນເຂດຊາຍແດນລະຫວ່າງ ມຽນມາ-ລາວ-ໄທ ໃນແມ່ນ້ຳຂອງ ໄດ້ກາຍເປັນສູນລວມຂອງແກັ່ງອາດຊະຍາກຳຈີນ ທີ່ສໍ້ໂກງເອົາຊັບສິນຂອງປະຊາຊົນ ດ້ວຍວິທີຫຼອກລວງຕ່າງໆຜ່ານທາງ ລະບົບອິນເຕີແນັດ ທັງຍັງມີການຄ້າມະນຸດຂ້າມຊາດທີ່ມີເຄືອຂ່າຍຢ່າງກວ້າງຂວາງ ແລະຂະຫນາດໃຫຍ່ທີ່ສຸດໃນໂລກອີກດ້ວຍ.
ໂດຍສາເຫດທີ່ເຮັດໃຫ້ເກີດສະພາບການດັ່ງກ່າວນີ້ ກໍຄືການທຸດຈະລິດຂອງບັນ ດາເຈົ້າຫນ້າທີ່ຂອງລັດທີ່ເຂົ້າໄປມີຜົນປະໂຫຍດຮ່ວມກັບກຸ່ມແກັ່ງອາຊະຍາກອນຈີນ ຈຶ່ງບໍ່ໄດ້ມີການປາບປາມຢ່າງຈິງຈັງ ໂດຍຫຼ້າສຸດ ທ່ານນາງ ແພທອງທານ ຊິນນະວັດ ນາຍົກລັດຖະມົນຕີໄທ ຈຶ່ງໄດ້ອອກຄຳສັ່ງໃຫ້ທາງການຕຳຫຼວດໄທ ຈະຕ້ອງເລັ່ງລັດໃນການເສີມຂະຫຍາຍການຮ່ວມມືກັບທາງການຕຳຫຼວດຂອງບັນດາປະເທດໃນລຸ່ມແມ່ນ້ຳຂອງດ້ວຍກັນຢ່າງຈິງຈັງ ດັ່ງທີ່ ທ່ານນາງ ແພທອງທານ ໄດ້ມີຄຳສັ່ງຕໍ່ກອງບັນຊາການຕຳຫຼວດແຫ່ງຊາດໄທ ວ່າ “ໃນເລື່ອງຂອງເຕັກໂນໂລຈີທີ່ອາຊະຍາກອນຈະໃຊ້ເປັນຊ່ອງທາງໃນການຫຼອກລວງປະຊາຊົນ ອັນນີ້ ກະຂໍໃຫ້ມີການປັບປຸງໃຫ້ເທົ່າທັນຢ່າງຕໍ່ເນື່ອງ ຄຽງຄູ່ໄປກັບການແກ້ໄຂກົດໝາຍ ຫຼືອອກມາດຕະການ ຊຶ່ງຈະຊ່ວຍໃນການປາບປາມອາຊະຍາກຳຢ່າງມີປະສິດທິພາບ ບໍ່ວ່າຈະເປັນໃນເລື້ອງຂອງການຍຶດຊັບສິນຂອງຜູ້ກະທຳຜິດກົດໝາຍ ຫຼືການດັດແປງສະກຸນເງິນດິຈິໂຕລ ຫຼືຊັບສິນດິຈິໂຕລອື່ນໆ ຖ້າເຮົາສາມາດຮ່ວມມືກັບປະເທດເພື່ອນບ້ານໄດ້ ຫຼືວ່າ ປະເທດທີ່ກ່ຽວຂ້ອງ ອັນນີ້ກໍເປັນສິ່ງທີ່ຈະຊ່ວຍໄດ້ ຈຶ່ງຂໍໃຫ້ປະຕິບັດຢ່າງຈິງຈັງ.”
ໂດຍການຮ່ວມມືໃນການປາບປາມອາດຊະຍາກຳທາງເທັກໂນໂລຈີໃນເຂດຊາຍແດນແມ່ນ້ຳຂອງ ລະຫວ່າງ ຈີນ-ລາວ-ມຽນມາ ແລະໄທ ຫຼືວ່າ ເຂດສາມຫລ່ຽມຄຳ ໃນຊ່ວງປີ 2023-2024 ທີ່ຜ່ານມາ ສາມາດຈັບກຸມ ແລະສົ່ງມອບຕົວຜູ້ຕ້ອງຫາສັນຊາດຈີນ 67,000 ກວ່າຄົນ ໃຫ້ກັບທາງການຕຳຫຼວດຈີນ ຊຶ່ງໃນນີ້ລວມຜູ້ຕ້ອງຫາ 15,970 ຄົນ ທີ່ຖືກຈັບຢູ່ເຂດເສດຖະກິດພິເສດສາມຫລ່ຽມຄຳທີ່ເມືອງຕົ້ນເຜິ້ງໃນແຂວງບໍ່ແກ້ວດ້ວຍ ໂດຍທັງໝົດເປັນສະມາຊິກໃນເຄືອຂ່າຍດຽວກັນ ທີ່ເຊື່ອມໂຢງກັບແກັ່ງອາຊະຍາກອນຈີນ ທີ່ຫລົບລີ້ຢູ່ໃນເຂດສາມຫລ່ຽມຄຳໃນປັດຈຸບັນ.