ຈີນກ່າວໃນວັນສຸກມື້ນີ້ວ່າ ຮອງປະທານປະເທດຈີນ ທ່ານ ຫານ ເຈີງ (Han Zheng) ຈະເຂົ້າຮ່ວມພິທີສາບານໂຕເຂົ້າຮັບຕໍາແໜ່ງຂອງວ່າທີ່ປະທານາທິບໍດີສະຫະລັດ ທ່ານ ດໍໂນລ ທຣໍາ ໃນວັນຈັນທີ່ຈະມາເຖິງນີ້.
ປັກກິ່ງກ່າວວ່າ ການເຄື່ອນໄຫວດັ່ງກ່າວດຳເນີນໄປຕາມ “ຫຼັກການຂອງຄວາມເຄົາລົບເຊິ່ງກັນ ແລະກັນ, ໃນມຸມມອງຂອງການຢູ່ຮ່ວມກັນດ້ວຍຄວາມສັນຕິ,ການຮ່ວມມືທີ່ເປັນປະໂຫຍດແກ່ທັງສອງຝ່າຍ ແລະຂະຫຍາຍສາຍພົວພັນກັບ ສະຫະລັດ.”
ໂຄສົກກະຊວງການຕ່າງປະເທດກ່າວໃນຖະແຫຼງການຕອນເຊົ້າຂອງວັນສຸກມື້ນີ້ວ່າ “ພວກເຮົາພ້ອມແລ້ວທີ່ຈະຮ່ວມມືກັບລັດຖະບານຊຸດໃໝ່ຂອງ ສະຫະລັດ ເພື່ອເສີມສ້າງການເຈລະຈາ ແລະການສື່ສານ, ຄຸ້ມຄອງບໍລິຫານຄວາມແຕກຕ່າງຢ່າງເໝາະສົມ, ເປີດກວ້າງການຮ່ວມມືທີ່ຕ່າງຝ່າຍຕ່າງມີຜົນປະໂຫຍດຮ່ວມກັນ, ຮັກສາຄວາມສໍາພັນຮ່ວມກັນລະຫວ່າງ ຈີນ ກັບ ສະຫະລັດ ໃຫ້ມີສະຖຽນລະພາບທີ່ເຂັ້ມແຂງ ແລະຍືນຍົງ, ພ້ອມທັງຫາຫົນທາງທີ່ຖືກຕ້ອງ ເພື່ອໃຫ້ທັງສອງປະເທດຢູ່ຮ່ວມກັນໄດ້.”
ການປະກາດດັ່ງກ່າວມີຂຶ້ນລຸນຫຼັງ ທ່ານ ທຣໍາ ໄດ້ທໍາການເຊື້ອເຊີນປະທານປະເທດຈີນ ສີ ຈິ້ນຜິງ ແລະຜູ້ນຳຕ່າງປະເທດຄົນອື່ນໆໃຫ້ເຂົ້າຮ່ວມພິທີສາບານໂຕເຂົ້າຮັບຕໍາແໜ່ງຂອງທ່ານ ເປັນເວລາຫຼາຍກວ່ານຶ່ງເດືອນ. ນີ້ ເປັນການເຄື່ອນໄຫວທີ່ບໍ່ເຄີຍມີມາກ່ອນ ແລະຖືເປັນການກະທໍາທີ່ແຕກຕ່າງຈາກປະເພນີເດີມ, ນັບຕັ້ງແຕ່ມີປະຫວັດວ່າ ບັນດາເອກອັກຄະລັດຖະທູດຕ່າງປະເທດຈະເຂົ້າຮ່ວມພິທີສາບານໂຕຂອງປະທານາທິບໍດີ.
ນັກວິເຄາະກ່າວວ່າ ປັກກິ່ງ ກຳລັງສະແດງໃຫ້ເຫັນ “ຄວາມມຸ້ງຫວັງ” ຕໍ່ລັດຖະບານໃໝ່ຂອງ ທ່ານ ທຣໍາ ໂດຍການສົ່ງ ທ່ານ ຫານ ເຂົ້າຮ່ວມ.
ທ່ານ ຊູ ໂບ (Zhou Bo), ພະນັກງານອາວຸໂສຢູ່ທີ່ສູນຄວາມໝັ້ນຄົງດ້ານຍຸດທະສາດສາກົນຂອງມະຫາວິທະຍາໄລຊິງຮວາ ໃນນະຄອນຫຼວງປັກກິ່ງ ກ່າວວ່າ “ຈີນ ບໍ່ມີປະເພນີທີ່ຈະໃຫ້ປະທານປະເທດເຂົ້າຮ່ວມພິທີສາບານໂຕເຂົ້າຮັບຕຳແໜ່ງຂອງຜູ້ນໍາປະເທດອື່ນ.”
ທ່ານກ່າວຕໍ່ VOA ຜ່ານທາງໂທລະສັບວ່າ “ການສົ່ງຮອງປະທານປະເທດເຂົ້າຮ່ວມພິທີສາບານໂຕຂອງ ທ່ານ ທຣໍາ ແມ່ນທາງເລືອກທີ່ດີທີ່ສຸດ ແລະຖືເປັນການສະແດງໃຫ້ເຫັນເຖິງເຈຕະນາທີ່ດີຂອງປັກກິ່ງຕໍ່ປະທານາທິບໍດີສະຫະລັດ ທ່ານ ດໍໂນລ ທຣໍາ.”
ໃນຂະນະທີ່ ປັກກິ່ງ ພະຍາຍາມຕອບສະໜອງໃນທາງບວກຕໍ່ການເຊື້ອເຊີນຂອງ ທ່ານ ທຣໍາ, ຜູ້ຊ່ຽວຊານຫຼາຍຄົນຊໍ້າພັດກ່າວວ່າ ການເຂົ້າຮ່ວມຂອງ ທ່ານ ຫານ ເປັນພຽງພິທີການຫຼັກເທົ່ານັ້ນ.
ທ່ານ ຊິກຸນ ຊູ (Zhiqun Zhu), ຜູ້ຊ່ຽວຊານດ້ານນະໂຍບາຍການຕ່າງປະເທດກ່ຽວກັບຈີນຢູ່ທີ່ມະຫາວິທະຍາໄລ ບັກແນລ (Bucknell) ໃນລັດເພັນຊີລວາເນຍ ກ່າວວ່າ “ຂ້າພະເຈົ້າບໍ່ໄດ້ຄາດຫວັງຫຍັງຢ່າງເປັນຮູບປະທໍາຈາກການເດີນທາງໄປວໍຊິງຕັນຂອງ ທ່ານ ຫານ.”
ເຖິງແມ່ນການເຂົ້າຮ່ວມພິທີສາບານໂຕຂອງ ທ່ານ ຫານ ຈະມີລັກສະນະພິເສດກໍຕາມ, ແຕ່ ທ່ານ ຊູ ກ່າວວ່າ ການເຄື່ອນໄຫວຂອງປັກກິ່ງ ຍັງສາມາດ “ວາງພື້ນຖານທີ່ດີ” ໃຫ້ແກ່ການພົວພັນລະຫວ່າງ ສະຫະລັດ ແລະ ຈີນ ພາຍໃຕ້ການບໍລິຫານງານຄັ້ງທີ 2 ຂອງ ທ່ານ ທຣໍາ ອີກດ້ວຍ.